舊城街頭

拄拭過的玻璃櫥窗
斜斜映照落雨後的街頭
古錐的尼尾仔放學的書包
春風中哪行哪耍
晃咧晃咧晃出輕快的線條
妝媠猶澹漉漉的石磚路上
雄雄失去雨傘的單調

燕仔低低飛過
巷仔內盡情開花的九重葛
嬌豔甲小可仔過頭
亭仔跤閒袂牢的九官講著話來
佮頂擺見面仝款無大無細
推趚黃昏瘦瘦長長的背影
沿路叫賣大麥粥的老歲仔講伊吵
嘛算有吵出淡薄仔情調

新搬來猶懵懵懂懂的
是歹勢歹勢
宓佇殘缺的牆仔縫探頭的小野草
看起來佇地頭行踏真久啊
彼隻趴佇土跤假死的老烏狗
只是看破俗事爾爾
問附近彼幾口灶暗頓煮啥
氣味調了安怎其實伊攏知影
再會啦
漸漸入夜的
我毋甘行遠去的
舊城街頭