台灣文學館的咖啡店

隔著一列椰子樹
一列鳳凰木
框佇紅磚石牆的窗仔
淡薄仔出神
看南門路流動的車輛
陷入日據時代的回憶

窄窄的偏門頭前
木造的平台頂面
幾座當作家已
佇沙灘度假的桌椅
弛弛斜斜的遮陽傘
嘛淡薄仔出神
雖然怹無沒啥物過去
會當回憶

一杯微糖的冰咖啡
陪我坐佇黃昏的冷風中
幾個無張持孚出來的
大箍甲予我聯想著橡木酒桶
感恩節火雞的外籍旅客
佇旁仔自在的大聲談笑
無任何的警示
甲一丸大大的
古怪的
身佇異國的感覺
擲來予我

年咧過有偌緊？
天色故意暗甲足慢
足慢
一粒紅燈亮焯起來
這幾日來猶滇滇的
快活春意
一下手
予彼架無頭無面
雄雄迴轉的休旅車
攏總載去